Hércules, presente na Feira do Libro de Santiago
Hércules de Ediciones estará presente na Feira do Libro de Santiago, que se celebra na Alameda. A editorial ten sinaturas de libros das súas últimas novidades.
Sábado, 29 de abril
Sinatura de exemplares: “A miña cadeliña / Mi perrita Pinta”. Francisco Rodríguez Iglesias e Estefanía Padullés asinarán exemplares deste conto infantil que supón a primeira obra de ficción do editor de Proxecto Galicia e presidente de Hércules: un canto de amor aos animais e a natureza que reflicte a tenra relación entre un avó e a súa neta.
- 12.00h Caseta da Libraría Ler
Sinatura de exemplares “Empanadas, bizcochos e ricos dulces”. A popular blogueira gastronómica Isabel Fraga Blanco, más coñecida como Frabisa, asina o seu libro de receitas Empanadas, bizcochos y ricos dulces, que recolle máis de cen elaboracións, desde as máis tradicionais ata as propostas máis innovadoras.
- 12.30h Caseta da Libraría Cortizas
Sinatura de exemplares: “Mortiña” Os tradutores Rosa Marta Gómez Pato e Manuel González González asinan exemplares da quinta entrega da exitosa saga da nena zombi creada pola ilustradora italiana Barbara Cantini.
- 18.00h Caseta da Libraría A Gata Tola
Sinatura de exemplares: “Estrelas galegas da ciencia” Maite Vence e Manuel Vicente asinan exemplares deste libro ilustrado de ton divulgativo que explica a historia da ciencia feita en Galicia e dos seus persoeiros e achados máis significativos.
- 18.30h Caseta da Libraría Cortizas
Domingo, 30 de abril
Sinatura de exemplares: “A saga das curandeiras” A recoñecida bióloga galega Marisa Castro asina a súa primeira novela, na que se achega ao universo das curandeiras a través da vida de Rosalía Carcedo, personaxe ficticio baseado na sabedoría dos antepasados da autora, que pertence a unha longa saga de curandeiros.
- 18h Caseta da Libraría Ler
Mércores 3 de maio
Sinatura: “Teoría King Kong”. A tradutora Raquel Senra asina exemplares de Teoría King Kong. Este incisivo ensaio da escritora e cineasta francesa Virginie Despentes está editado en galego dentro da Colección Púrpura, que busca achegar ao galego textos de referencia do feminismo actual.
- 19h Caseta da Libraría Ler
Venres 5 de maio
Sinatura de exemplares “Paco del Riego. Un home irrepetible” A profesora e investigadora Blanca Ana Roig Rechou asina exemplares do seu libro dedicado a Francisco Fernández del Riego. Orientado ao público escolar, o libro recolle un anaco da historia de Galicia entre 1913 e 2010 seguindo as aventuras literarias, políticas e lúdicas do intelectual que este ano protagoniza as Letras Galegas.
- 17.30h Caseta da Libraría Cortizas
Sábado, 6 de maio
Sinatura: “A pantasma colorida / El fantasma colorido”. Rocío Pedreira e Gema García asinarán exemplares deste libro infantil que conta a historia do país das pantasmas, onde todas se esforzan por manter as súas sabas limpas e brancas. Mais unha pequena pantasma moi especial vese tentada a achegarse ás fermosas flores de cores que todas as demais miran dende lonxe con temor. Tras coñecer ao neno Oliver, descobre o valor da amizade e a importancia de perder o medo ao descoñecido.
- 19.30h Caseta da Libraría A Gata Tola
Domingo 7 de maio
Sinatura de exemplares “A canción do cambio”. As tradutoras Ivonete da Silva Isidoro e Fe González Fernández asinan exemplares de “A canción do cambio”, o himno ilustrado da poeta e activista estadounidense Amanda Gorman, que conmoveu ao mundo coa súa intervención na investidura de Joe Biden. O libro, ilustrado por Loren Long, foi número 1 en vendas en Estados Unidos e chega por primeira vez ao galgo da man de Hércules.
- 12h Caseta da Libraría A Gata Tola
Sinatura de exemplares “Isto é rock”. O periodista Javier Becerra asina este libro ilustrado por Catuxa Alonso que convida á cativada a descubrir a historia das cancións que revolucionaron a historia da música e polo que desfilan artistas como Chuck Berry, The Supremes, Los Ramones, Amy Winehouse, Kiss, Janis Joplin ou Joan Jett.
- 18h Caseta da Libraría A Gata Tola